UN Women

UN Women er eina stofnun Sameinuðu þjóðanna sem vinnur eingöngu í þágu jafnréttis. UN Women hefur haft viðveru í Sierra Leóne frá árinu 2002 og hefur til að mynda sett á laggirnar „one stop“ miðstöðvar fyrir þolendur kynbundins ofbeldis í samstarfi við Jafnréttis- og barnamálaráðuneyti þar í landi. Í miðstöðvunum hljóta þolendur læknisþjónustu, lagalega ráðgjöf og sálræna aðstoð, án endurgjalds. Eins hefur UN Women unnið náið með fjölda héraðs- og þorpshöfðingja til að breyta viðhorfi þeirra til kvenna og kynbundins ofbeldis. Um 40 höfðingjar hafa þegar hlotið fræðslu og hafa í kjölfarið beitt sér í sínum samfélögum gegn kynbundnu ofbeldi og sýnt þolendum stuðning í verki.